Бернияз Күлеев бұрынғы Ақтөбе губерниясы Бөрте болысының 5 ауылында 1899 жылы туған. 1917 - 1918 жылдары Б. Күлеев Орынбор қаласындағы қазақтың учительдік семинариясында оқып білім алады. Сол семинарияда оқып жүрген кезінде бір қыдыру өлең және драма жазады. Көп ұзамай оқуын тастап, Бернияз Күлеев Торғай облысында кеңес қызметін атқарады, сол жылдарда шығып тұрған «Қазақ мұңы», «Ұшқын» газеттерінде көп қызмет етеді.Соңғы жылдарында Қазақ Республикасы халық ағарту комиссарятының жолдауы бойынша Қазан қаласында қазақ кітаптарын бастырып шығару ісін басқарады. 1923 жылы 29 қаңтар күні Бернияз Күлеев кенеттен қайтыс болады.Бернияз Күлеев аз өмірінің ішінде әдебиет майданында жемісті еңбек етіп, едәуір әдеби мұра қалдырды. Көптеген өлеңдерімен бірге екі - үш поэма жазды. А.С. Пушкин, М.Ю Лермонтов тағы басқа орыс ақындарынан аударма жасады.